HAK-ho Parseiru Estratéjiku Realiza Programa Auditoria Sosiál Liu Husi Diskusaun Kartaun Pontuasaun Komunidade (KPK) iha Suku Dato

Vice Diretór HAK, Sr. Antonino de Limas, iha ninia intervensaun haktuir katak direitu asesu ba Saúde, Edukasaun no Asesu bee moos nu’udar direitu umanus tanba bee moos importante ba moris, fornesementu bee moos ba fasilidade públiku laiha ne’e problema ba sosiedade. Estadu tenke respeitu proteze no hakonu direitu sidadaun sira nian, Estadu iha dever hakonu direitu sidadaun sira nian asesu ba bee moos. HAK kontinua koalia kona-ba preokupasaun komunidade sira nian, hodi bele hetan apoiu husi Estadu no parseiru sira hodi haree bee matan sira hodi kanalizasaun sistema bee moos ba to’o komunidade sira. Servisu sira ne’e la’o integradu hodi fó benefisiu ba komunidade sira iha suku Dato, maibé komunidade sira iha obrigasaun no responsabilidade atu kuidadu fasilidade públiku nia sustentabilidade. Grupu Maneja Fasilidade (GMF) hamutuk ho komunidade presiza tau atensaun ba manutensaun ba fasilidade sira. Mundansa Klimatika ne’ebé halo bee matan sira maran  hotu, nun’e komunidade sira presiza halo konservasaun bee matan liu husi aktividade kuda ai-oan nune’e bele proteze bee matan sira labele maran. Ita bele iha buat hotu maibé loron ida la hemu bee moos ne’e problema boot.

Jestór Programa WaterAid, Sra. Livia da Cruz, iha ninia intervensaun Sorumutu ida ohin loron ne’e atu halo avaliasaun ba fornesementu bee moos iha Suku Dato, hodi haree fali ba fornesementu bee ba komunidade nune’e mós haree liu ba atinjimentu no sustentabilidade parte seluk presiza haree mós kona-ba mudansa klimatika no partisipasaun Feto ho Ema ho Difisiensia. Komunidade sira tenke kuidadu no halo jestaun ba fornesmentu públiku sira, tenke iha partisipasaun husi feto ba iha estrutura Grupu Maneja Fasilidade-GMF.

Objetivu  prinsipal seluk mak atu identifika problema sira atu tau ba iha planu prioridade nune’e bele aliña planeamentu ba Suku Dato nian, hodi nunee bele relata problema sira ba Postu, Munisípiu  no nasionál nune’e mós hato’o ba parseiru sosiedade sivíl sira tuir nesesidade ne’ebe iha. Husi deskobrementu problema sira ne’e Suku Dato no Postu bele uza sai ba planu dezenvolvimentu suku nian  nune’e mós hodi relata ba Munisípiu relasaun komunidade sira nia problema iha Suku Dato fóku ba Bee, Saneamentu no Ijiene-BESI.

Jestór programa WaterAid mós hatutan prosesu Mekanismu Retroasaun nu’udar meteodu ka maneira oinsá atu kanaliza informasaun ba ema ne’ebé kaer kna’ar sira, komunidade mós iha dever atu husu ita nia direitu ba ema sira ne’ebé kaer kna’ar nain sira hodi hatan ba preokupasaun komunidade sira nian,  dalan atu kanaliza problema sira hato’o ba  Sosiedade Sivíl no Governu hodi bele responde. Dekretu lei  numeru 4/2004/, Jestaun ba bee rurál resposabilidade mak GMF no komunidade, maibé la taka dalan ba Governu lokál atu responde ba problema ne’ebé boot komunidade sira hasoru. Papel sosidade sivíl lori komunidade sira nia lian  ba instituisaun sira hodi responde ba nesesidade komunidade sira nian iha nivél Suku.

Xefi Suku Dato, Sr. Oscar da Silva, iha ninia intervensaun koalia ba bee, bee mak bele fó moris ba ema nune’e husu ba lideransa baze sira presiza tau matan ba bee no mós ba komunidade sira atu iha konsiensia ba kuidadu bee moos, Suku Dato iha aldeia 10, aldeia Quirilelo mak kondisaun bee moos ladi’ak, bee ne’e importante atu kuidadu fasilidade públiku sira, aproveita iha diskusaun ne’e husu ba komunida sira labele lori balada ba kesi besik bee matan sira,  hanesan autoridade lokál sei mobiliza komunidade Suku Dato hodi halo tara bandu, komunidade Aldeia 4 mak partisipa, komunidade aldeia Quirilelo la partisipa iha atividade Kartaun Pontuasaun Komunidade-KPK, husu ba komunidade sira atu partisipa ativu.

Administrador Postu Administrativu Liquiça, Sr.Rogerio dos Santos, iha ninia intervensaun hateten Dekretu lei numeru 86/2006, papel Prezidente Autoridade haree ba nivél Munisipál, postu administrativu ekstansaun haluan prezidente administrativu nia servisu hodi haree liu ba nesesidade ba komunidade sira nian liu-liu tau matan mós ba amandamentu komunidadade sira nian hodi asesu ba bee moos.

Informasaun Relevante : Kondisaun Atual Bee Moos iha Munisipiu 8 Periduo 2022-2023

Postu Liquiça deklara ona Área la Soe Fo’er Boot Arbiru-ALFA nune’e ligasaun ho Ijiene husu ba komunidade sira atu instala Sintina ijiene ho kondisaun modernu tanba ne’e ligasaun ba Saúde. Komunidade sira labele ezeji de’it direitu, maibe presiza partisipa ativu iha enkontru sira tanba dezenvolvimentu ne’e husi baze ba to’o nasionál, husu komunidade sira tenke iha konsiensia no iha  obrigasaun atu kuidadu fasilidade  bee moos ne’ebé parseiru sira instala ona.

Grupu Maneja Fasilidade- GMF tenke ativu  servisu hamutuk komunidade hodi haree sustentabilidade  bee moos. Autoridade nafatin iha dever hodi buka dalan servisu hamutuk ho parseiru sira hodi hatan ba preokupasaun komunidade sira nian. Suku Dato tenke halo tara bandu  ho ninia objetivu mak ema labele estraga fasilidade públiku iha suku Dato. Husu partipasaun feto tenke ativu tanba inan feto sira mak uza bee barak nune’e tenke partisipa ativu hodi nune’e hato’o problema bee moos iha enkontru KPK ne’e.  

Ofisial Komunikasaun no Konesimentu WaterAid, Sra. Marlinda Jeronimo nia hatutan iha sesaun Salvaguarda atu proteze ita nia a’an bainhira hasoru situasaun ne’ebé halo la komfortavel liu-liu asedu seksual, fiziku, abuzu, mental , esplorasaun no manipulasaun, ema sira ne’ebé mak atu sai vitíma mak labarik, feto no ema ho edifisiensia sira. Bainhira hasoru problema manipulasaun sira ne’e hato’o ba pontu fokal, karik hasoru asedu, hato’o parte instituisaun sira ne’ebé tau matan ba hanesan Ministériu Solidariedade no inkluzaun sosiál-MSSI, Uma Mahon, PRADET no Alfela hodi hetan akonselamentu, ba labarik minoridade  sira lori ba hato’o iha INDICCA no Ema ho Defisiensia hatoo keixa ba ADTL.